Huwa haipendezi pale mtu anaposhindwa na jaribu,  Sasa nani wakulaumiwa?  Je!  Ni sisi wenyewe?  Lakini wengine watasema ni Shetani.  Wengine wanauliza, kwa nini Mungu alimruhusu Shetani anijaribu?

Swala la kutupiana lawama huwa ni ishara ya mtu kushindwa na jaribu.

Yakobo 1:13-16  Mtu ajaribiwapo, asiseme, Ninajaribiwa na Mungu; maana Mungu hawezi kujaribiwa na maovu, wala yeye mwenyewe hamjaribu mtu.  Lakini kila mmoja hujaribiwa na tamaa yake mwenyewe huku akivutwa nakudanganywa.  Halafu ile tamaa ikiisha kuchukua mimba huzaa mauti.  Ndugu zangu wapenzi, msidanganyike. 

Tunyoshe mambo kwanza.  kwanza, tujue kwamba Si asili ya Mungu kutujaribu, kwa hiyo yeye mwenyewe hawezi kutujaribu.  Na hata kama Shetani anahusika mara kwa mara, katika mistari hii Mungu anaweka lawama zote juu yetu sisi wenyewe. 

Ni kwamba, mtu unatamani kitu ambacho huna – hii ndiyo cheche ya matamanio.  Kadiri unavyoendelea kufikiria kile kitu, ndivyo unavyozidi kushawishika na kuvutwa nacho.  Cheche za tamaa zikichochewa na fikra huwa zinageuka na kuwa dhambi.  Halafu kadiri unavyotenda dhambi ndivyo unavyozidi kufuata njia iendayo kwenye mauti ya milele. 

Ndugu zangu wapenzi, msidanganyike.  Kuna wakati  si Shetani anakujaribu, bali ni maamuzi yako wewe mwenyewe.  Kwahiyo, jaribu kudokeza tamanio linalokuongoza kila wakati kutenda dhambi.  Lipeleke na uliache msalabani. 

Hili ndilo Neno la Mungu safi na lenye afya kwa ajili yako leo.