Enye into ebuhlungu esiyizwayo ibe njengezikhisi la khona impilo inzima ngumuzwa wokushiwa nguNkulunkulu , kube sengathi impela  usilahle le kude wasilaxaza okwenyongo yenyathi  ,usikhohliwe akasasiphuphi noma elele . 

Uma ukucabanga lokhu ,lomuzwa wokushiwa nguNkulunkulu uma usenkingeni ,ungumuzwa oyimvelo kumuntu uma esengxakini. Ubuhlungu bunomoya wokusihlukanisa nalabo abasithandayo okudlulele ngisho nakuNkulunkulu okunguYe ongasisindisa kulobobuhlungu .

Ngakho uma kungukuthi sewuke wakuzwa lokho kuqhela kuNkulunkulu ,yazi lokhu sihlobo sami awuwedwa kulowomuzwa .Nami sengike ngaba kulesosigodi  njengokuba nabaningi asebeluhambile loluhambo bebhakanile naso  . Ngakho ithini impendulo?  

Manje singalungisa kanjani lezindonga imizwa yenhliziyo yakho ebhekana nazo , ebukeka inamandla amangaka ekwazi ukuba nomthelela wokukwenza uzizwe uwedwa ,ushawe ngumhlaba ? 

Impendulo ngukuvumela uNkulunkulu ukuba akhulume nawe kuleyondawo eligumbi ozizwela ulahliwe kulona . Impendulo  ngukukholwa akushoyo ngaphezu kwalokho okushiwo yimizwa yenhliziyo yakho .

Isaya  43:1-3 Kepha manje usho kanje uJehova owakudalayo wena Jakobe nowakubumba wena Israel  ,uthi  “Ungesabi ngokuba ngikuhlengile, ngikubizile ngegama lakho ungowami.Lapho udabula  emanzini mina nginawe ,nasemifuleni ayiyikukukhukhula ;lapho uhamba emlilweni awuyikusha, nelangabi aliyikukushisa .Ngokuba nginguJehova uNkulunkulu wakho oNgcwele kaIsrael, uMsindisi wakho .

Iqiniso ngukuthi uNkulunkulu akazange akushiye kuleyondawo  kwakhona ekuqaleni. Iqiniso ngukuthi unawe khona lapho kanye ngoba unguNkulunkulu wakho ,unguMsindisi wakho .

Yilona nebala  iZwi likaNkulunkulu leli … Eliza kuwe li-Fresh namhlanje..